Manjawek daganglah gadih, "O,Mintuo dangakan malah, bia tajelo tajilapak, kok tak suko urang maagiah, namun indak ka Gadiah ambiak."
Kok untuang mintuo gadih, kato nan indak ka bajawek. Barisuak siang candonyo hari, bakato mintuo gadih, "O, Piak Gadih Basanai, hunilah rumah gak sabanta, mintuo nak raso ka muaro, mintuo nak raso ka tapian." Kato sampai wakatu itu, nyo ambiak kain sabalunan, bagolai ka tangah laman, barangkeklah liau ka tapian. Dek lamo lambek nan di jalan, lah sampai liau ka tapian, indak dapek liau manyasah, urang batanyo-tanyo juo, iko bana tanyo urang, "O, Mintuo dangakan malah, bari luruih kami batanyo, lai koh jadi gadih kawin jo Sutan Ali Amat."
Manjawek mintuo gadih, "Kalau itu Nak nan ditanyokan, kok untuang si Ali Amat, mintak janji sabuian ganok, inyo ka Pagai jo ayahnyo, taniaik sajak dari ketek, pulang dari Pagai kawin juo. Ado kok pelang ka nyo tompang, pelang nan capek pulang pai, banamo pelang Lumuik Hijau."
Paningga mintuonyo di tapian, bakatolah gadih Rang Basanai,
"Pado ribuik baiaklah padi
pado pandan maleto urang
Pado hiduik baiaklah mati
pado badan manyeso urang.
Sikudidi makan ka pantai
kariang pasang makan ka tangah
pado hiduik bacamin bangkai
bialah mati bakalang tanah.
Takucak aia Sungaibamban
karano mangguang ka tapian
bialah hilang nyao badan
pado manangguang parasian."
Kato sampai, nyo kanakkan janjang ka pagu, lahnyo ambiak minyak nan tagantuang, sarato sikek jo camin, nyo bao ka tangah rumah. Paningga mintuonyo ka tapian, baminyak Gadih rang Basanai, nyo minyakkan abuak nan panjang, lah sudah gadih bami-
469
