nyak, nyo ambiak sikek sabuah, nyo sikek abuak nan panjang. Lah sudah gadih basikek, nyo buek sanggua lipek pandan, nyo buek sanggua guyah gaia. Lah sudah gadih basanggua, nyo ambiak camin nan sabuah, bakato daganglah gadih,
"Tuan Katik Labai Maomin
parak ado batabu alun
Tadagak den liek camin
galak ado batamu balun."
Kok untuang Gadih Basanai, minyak habih taraso sakik, mandanyuik di ampu kaki, mambaleh ka bubun-bubun, raso kabongkah bubun-bubun, raso karuruik rambuik nan panjang, raso kahilang nan bakato, raso kararak tulang dado, raso dianyang lado mudo, raso disingguang paneh patang. Co iko bana sakik badan, bagolek-golek gadih ateh rumah. Dek lamo lambek dek bagolek, bakato-kato samo sorang. "Pado den bagolek di tangah rumah, elok den bao bakalumun, kok batanyo beko mintuo awak, dikatokan mato sangaik mangantuak." Kato sampai gadih bagolek, nyo bao tidua di tangah rumah, nyo bao bakalumun panuah. Kok untuang mintuo gadih, takana minyak ditinggakan, hati mintuo tak sanang lai, lah liau ambiak kain sabalunan, balari babaliak pulang. Dek lamo lambek dek bajalan, tibolah liau di tangah laman, liau ampaikan kain di sampaian, naiaklah liau ka atch rumah, lalu mahimbau mintuo gadih, "O,Gadih rang Basanai, iko ka contoh garang paneh, mangapo tiduo bakalumun."
Manjawek daganglah gadih, "Mato gadih sangaik mangantuak, sajak mande indak babapak indak, sinan kurang lalok lai.”
Kok untuang mintuonyo, nyo buang caliak ka bubungan indak ado minyak tangantuang, dibuang calíak ka tangah rumah lah batabua sikek jo camin, hati mintuo tak elok lai."O, Piak Gadih Basanai, tampan kasansai udo kau, Nak."
Bakato daganglah gadih, "Indak tatangguang doh mintuo oi, indak tabado.
Rigo-rigo pai ka pukek
tibo di pukek mambali bada
Sagirolah mintuo mancari ubek
jan lamo panyakik tingga.”
