Ka den baakan padi nangko
padi rawang balun tumbuah
Ka den baakan hati nangko
dagang hilang tadagak tumbuah
Cubadak manangah koto
ditanam sukun tapi banda
ayam kuriak si Maragelang
taji dipiliah si Barumbun
lai rupokan dalam hati
tumbuah sariak di tapi koto
Kok den agiah Tuan sakaliko
kok Tuan turun ka duya
kok isuak takaba sanang
Bukik kok bisuak ka balinduang
lurah kok dalam panyuruakkan
ka lupo jo buruak gadih
guno baiak ka hilang sajo."
Manjawek Sutan Ali Amat,
"Kalau didaki gunuang bakabuik
tuan-tuan pulang manembak
disakah rantiang limau lunggo
O Piak jan banyak sabuik
sadang lameh di lamun ombak
takabua niaik den baleh guno."
Panek batangka jo bagigiah, bakatolah Puti Taruih Mato, "Kok itu nan Tuan cari, kok itu nan dimukasuik, babaliaklah Tuan ka balakang, mintak di mandeh kanduang gadih."
Barangkek Ali ka balakang, hati nan indak elok lai, bajalan babaliak pulang, duo jo Kambang Manih Gino. Dek lamo lambek dek bajalan, lah tibo di laman rumah mandeh, mahimbaulah liau dari rumah, "Lai koh dapek nan dicari, lai tabao nan dijapuik, lai koh buliah nan dikandakkan."
Manjawek si Ali Amat, "Kalau itu nan Mandeh tanyokan, lai 'Ndeh kanduang nan manyimpan." Mandanga kato si Ali Amat,
lah berang mandeh kontan gadih, marentak turun ka halaman,
483
