Karambia balah dek bulan
balah jo anak batu lado
Hiduik mati di tangah Tuan
indak gadih banyak bicara."
Bakatolah Sutan Ali Amat, "Kok iyo namuah gadih babaliak, kok kito ka marantau panjang, eloklah kawin kito di siko." Dapek hetongan nan sasuai, bakaua si Ali Amat, nyo unjamkan lutuik nan duo, nyo takuakan kapalo nan satu. Lah sujuik si Ali Amat, nyo susun jari nan sapuluah, lah sujuik Ali ka kabilaik. Barakaik Allah, waliullah, barakaik Makah Madinah, barakaik kiramaik Gunuang Ledang, tampek mamintak nan kabuliah, tampek bakaua rang nan banyak, datangkan haji dari Makah, turunkan buya dari gunuang, tibokan labai dari lauik, tolong kawinkan kami di siko."
Pintak nan sadang ka balaku, pinto sadang ka buliah, kaua sampai samaso itu, lah tibo haji dari Makah, lah datang labai dari lauik, turunlah buya dari gunuang. Nyo kawinkan Sutan Ali Amat, duo jo Gadih Rang Basanai. Ado sabanta antaronyo, ijab jatuah kabua nyo jawek, kawinlah gadih jo Ali Amat, kawin di puncak Gunuang Ledang. Lah sudah inyo dikawinkan, babaliak haji ka Makah, barangkek labai ka lauik, mangirab buya nan ka gunuang, indak namuah rang gadih pulang, maleh babaliak ka ko- rong kampuang, ka dicubo marantau panjang.
Kok untuang Gadih Basanai, duo jo Sutan Ali Amat, sadang di puncak Gunuang Ledang, barangkek marantau panjang, lah nyo turuni bukik Gunuang Ledang. Dek lamo lambek bajalan, lah tibo inyo di lurah gunuang, tatapek ka anak sungai. Lah nyo mudiak-
kan anak sungai nantun, bajalan inyo kaduonyo, tak jaleh nagari ka dituju, indak tantu kampuang nan dituruik, di mano litak lah baranti, di mano patang sinan bamalam. Dek lamo lambek dek bajalan, habih hari baganti hari, kok untuang takadia Allah, lah sampai ka hulu sungai, tatapek ka karang tinggi. Lah didaki karang nan tinggi, kok babaliak rantau lah jauah, sinan bakaua si Ali Amat, "Nyo baka kumayan putiah, karatan kumayan Baruih, asok mandulang ka udaro, basaru si Ali Amat, "Ya Allah Tuhanku, kok buliah jo pinto, tolong gadangkan aia sungai nangko, hujankan hari labek-labek."
487
