nak alang tabang ka laman
sicerek tumbuah di tapian
layang-layang tabang malayang
ditangkok anak buruang kekeh
sikua maraok dalam rimbo
Malompek kalua Tuo balai
mano kalian sabalainyo
lah tigo bulan galanggang den rami
keok ayam bak dibandakan
bulu ayam menjadi ramo-ramo
ringgik menjadi kapeh tabang
siriah menjadi sarok balai
Gambia menjadi tanah liek
alun basuo nan bak nanko
Ntah kusuik ndak salasai
apoko sabab karanonyo
Layang tabang jo kekek
disakah dama dalam rimbo
sicerek tumbuah dalam padi
dama maleto di muaro
Manjawek janang lambek-lembek
mano tuo balai kato inyo
mangko tajadi bantah jo kalahi
danga Tuan ambo katokan
lah parangai Sutan Mudo
Lah sipasan di tapi ladang
ditabang batang limau lunggo
sicerek tumbuah tapi aia
tenggeran anak buruang bondo
Lah abih kepeang di pinggang
taruh urangnyo tampin juo
tampek utang tak tabaia
itulah sabab alah karanonyo, ka tarang jo tuan oi
Layang-layang tabang buruang murai
nyo seka dama di tapian
Halaman:Kaba Minangkabau 2.pdf/24
↓Laman ko alah sah
