Barabah tabang di ateh ngarai
dama tajelo di tapian
alah diariak yo Pak oi Gaek Kulai
katigonyo samo maariak
urang tuo lah mulai pakak
ariak nan indak yo kak oi kadangaran
Dama tatuga di ateh munggu
sicerek tumbuah ateh munggu
Kato rang maimbau bukakan pintu
jawek gek Kulai lai den santuang jo alu
Barabah tabang ka kamulau
dama maleto di Muaro
Dek barakaik yakin nyo maimbau
akianyo Gaek o nak oi tau juo
Takalok kawan di kurisi
ka mano kolah pangananyo
Pintu tabukak Gaek main kaki
takajuik tutan nan batigo
Rami pasanyo Koto Baru
rami manjalang pukua duo
Tanyo dek Kulai maso itu
apo mukasuik datang malam ko
Buruang morak tabang ka parak
Maraok sikua ka tapian
Dek Gaek Kulai sangaik pakak
nyo paratikan sajo ndeh garik tangan
Buruang banamo buruang nori
dama tajelo jo asam camin
Akainyo Gaek sampai mengarati
ka kito bunuah ndeh Aji Karini
Halaman:Kaba Minangkabau 2.pdf/40
↓Laman ko alah sah
