Karamuntiang di ateh parik
tenggeran buruang Reno Ali
Sudah baguntiang lah bajaik
bajujuik banang jo sikoci
Ka balai anak rang Duku
mamandang tagak ka hilaman
mamotong lalu pai ka sawah
Io samalam-malam itu
sapiciang haram balalokan
tauah balambin baju sudah
Karanggantiang jo Lubuaklingah
masuak ka kampuang Caniago
Lah duo pasang baju sudah
den pandang anak lalok juo
Saruyan di ujuang tabek
paubek urang Tanjuang Saba
dukun e anak rang subarang
Kato amak e lambek-lambek
kok io kalian ka sikola
mandilah nak ai ka balakang
Parapati tabang sajoli
inggok di ateh batang pandan
Baduo anak ka kamandi
anduak jo sabun nyo ambiakan
Karatak di tapi banda
nyo karek anak rang Solok
male-leo tantang padi
Anduak nyo sandang jo nan kida
sabun nyo ganggam jo nan suok
melenggok masuak kamar mandi
Halaman:Kaba Minangkabau 2.pdf/90
↓Laman ko alah sah
