Takalo maso dahulu
Inyo alah baguru
Inyo alah tamo mangaji
Alah bailimu dunia akhirat
Hambo raso indak baa
Sarahkan sajo lah ka untuang
Pulangkanlah ka takadia.
Manjawek Sutan Lembang Alam
"O bapak juo janyo hambo
Aluran kami nan baduo
Mamintak-mintaklah bapak
Tolonglah kami jo doa
Salamaik kami pulang baliak
Sasuai labia jo batin
Nan dicari lakeh dapek
Nan diama lakeh pacah
Lai hasia pintak kami."
93."Kalau baitu kato waang
Kami mandoakan dari rumah
Mamintak-mintaklah kami
Dibaka kumayan putiah
Tiok pagi jo tiok patang.
Katonyo ayah bujang Juaro.
94. Lah dibari ameh sa tahia
Kaganti pambali rokok
Ka pambali siriah di jalan
Sarato pambali aia
Lah sudah timbang tarimo
Lah basalaman jo Bujang Juaro
Duo jo Sutan Lembang Alam
Inyo bajalan pai sakali
Alah sarantang pajalanan
Cukuík katigo rantang panjang
Alah tiba di sinan
Di tabiang paninjauan
62
