III. RAMBUN PAMENAN MANTJARI MANDEHNJO.
Alah badjalan si Rambun Pamenan dihiliakan labuah nan pandjang hati basarang tinggi djuo. Dek lamo lambek di djalan lapeh dipadang ribo2 manampuah mandaki ka rimbo gadang kamano kareh dibawo untuang. Hari badarok patang djuo patang badjawek dengan malam lalok didalam rimbo gadang namun sa malam2 nantun sapitjiang tidak talalokkan dek dingin tidak tatanggungkan ajia mato djatuah badarai. Hari lah siang pulo lai badjalan Rambun Pamenan habih hari babilang pakan habih pakan babilang bulan habih bulan babilang tahun lah duo tahun didalam rimbo tak tantu nagari ka dituruik badan lah gadang dalam rimbo basuwo bukit alah didaki basuwo lurah dituruni dimano patang sanan baranti malam basalimuik ambun siang ditimpo paneh alah tigo tahun kalamonjo ijo bana bak pantun orang:
Mangkareh dipuntjak gunuang
dibaliak batang nalo nali,
Kamano kareh dibawo untuang
kabarang tampek maknjo pai
Adolah pado suatu malam sadangnjo laruik tangah malam ijo didalam rimbo rajo nantun Allahu Rabbi rusuah hati hudjan labek tidak tabado sanan manangih Rambun Pamenan takana dikato atjiak dahulu saketek tidak nan barubah ijo nan sarik pai marantau.
23
