Laju badjalan hanjo lai hari nan sadang bakabuik sandjo ajia mato ba darai2 Allahu Rabbi rusuah hati paruik litak taraso djuo alah sarantang padjalanan tampaklah lapau sabuah dituruik tjando kakian baranti tantang pintu lapau bakato injo maso itu:
Lai patimbo rang disiko
tanami djuolah bidjo djarak
sijangi djuo malah pandan,
Lai pahibo rang disiko
barilah hambo siso karak
untuk pauleh njawo badan.
Takadjuik mandeh rang balapau dilihek kapintu lapau tampaklah urang mudo matah basarawa pontong sadjo djatuah tahibo dalam hati lalu dihimbau hanjo lai: „O bujuang nan djolong datang anak makan malah kini kito makan ba samo2". Alah makan Rambun Pamenan makan sasuwok duo suwok tjukuik katigo injo manjuwok alah baranti injo makan alah sudah mambasuah tangan tamanuang Rambun Pamenan diambiak pitih nan sagadang barapolah hutang hambo mandeh pitih hambo sagadang sadjo hambo nangko dagang mularaik. Mandanga kato Rambun Pamenan manangih mandeh rang balapau: „O bujuang nan baru datang usah disabuik anak kanduang pitih pambajia bali nasi".
Mandeh tak namuah manarimo asa lai namuah anak disiko kok saharian duo bulan sampai bana sapuluah tahun nasi nan indak ka mambali tidakkoh anak batanjo sababnjo mandeh balapau nangko bukan mantjari pitih sadjo ganti pa rintang2 hati dek karano tidak banjak anak anak surang tungga babeleng kini kok namuah ang disiko barapo kasanangnjo hati hambo anak surang
40
