Bantiang lah lari masuak samak
Kudonyo bak nantun pulo
Ayam jo itiak habih mati
Itiak Jaonyo jadi ondak
Parapati tabang mangirok
Sawah nan tujuah bando
Sawah manjadi rimbo gadang
Lah turun si Murai Randin
Inyo bakato ka si Kambang
"Kambang Manih adiak kanduang
Turun kau di ateh rumah
Caliak di adiak kayo Allah
Gampo galomat nan tibo.
Mahambua si Kambang Manih.
Bakato si Murai Randin
"Rumah gadang manjadi munggu
Rangkiang manjadi tunggak
Padi den manjadi kasiak.
Kalikih di ladang kapeh
Dobao anak rang Tanjuang.
Barang nan habih mak nyo tandeh
Mak pueh hati mande kanduang.
Dilayuakkanyo salayuak
Lah runtuah rumah nan gadang
Malenggang si Murai Randin
Lah tabang si Bayau-bayau
Malangkah inyo salangkah
Tajungkang si Tinjau-lauik
Nan ketek lah kamurantang
Barakat pintak si Murai.
Balari-lari kapincuran
Inyo basahuik basangkuno
"Kok buliah pintak pado Allah
Pincuran gadiang jadi tanah.
Kuntang tahualah sumua nangko
Sumua nangko ka den tinggakan
Mak sanang hati mande kanduang.
Mambasuah muko anyolai
56
