Manjawab si Murai Randin;
"Hai tolan sahabat hambo!
Usah tolan rusuahkan tika
Tika den kabaruahkan
Ka tika urang Pariaman
Usah tolan rusuah ka tingga
Tingga lah den pitaruahkan
Antaro pintu jo halaman.”
Bakato malah urang kampuang:
"Bago baitu kato adiak
Indak amuah kami malapeh
Ka ganti inyiak mamak kami
Kaganti subang jo galang
Mangko tak suko kami malapeh
Adiak kanduang si Murai Randin
Suluah bendang dalam nagari
Marawa gadang tangah koto
Payuang panji urang nagari
Nan tasabuik ka kaluaran:
Adiak nan cadiak biopari
Pandai maagak maagiahkan
Pandai manakok rumah
Nan tacelak tampak jauah
Nan tabirumbun tampak hampiang
Adiak kanduang si Murai Randin."
Dek lamo bakalamoan
Panek bagigiah jo batangka
Marentak si Murai Randin.
Lah banduang candonyo ratok
Gadang ketek tuo mudo
Pahunyi kampuang lah bajalan
Bajalan panjang anyolai.
Bakato si Murai Randin
"Sitapuang tangah halaman
Den ambiak kiliaran taji
Tingga kampuang tingga halaman
Tinggalah sumua bakeh mandi.
58
