Dek lamo maso bajalan
Lah lapeh pulo dari kampuang
Manampuah rimbo anyolai.
Manangih si Murai Randin
"Anak rang di Koto Tuo
Nak lalu ka Mandailiang
Manangih ka masuak rimbo
Tak buliah kawan sairiang.”
Ditampuah malah surang samiang
Manangih dalam rimbo:
"Tuan den si Manjau Ari
Manyahuik tuan den himbau
Rimbo mano tuan hunyikan
Kampuang mano nan ditunggui?"
Dek lamo maso dijalan
Aia mato badarai-darai
Dihapuih jo tangan kida
Disipekkan abuak jo nan suok.
Male rimbo lah dirimboi
Male bukik lah didaki
Bajalan surang padusi sajo
Surangpun indak rang basuo
Indak buliah tampat batanyo
Siang malam bajalan juo
Dimano panek dimano bahanti
Lah sabulan lamo di jalan
Lah tibo inyo di sinan
Dibuang pandang suok kida
Bacampua harok jo cameh
Indak inyo nampak si Manjau.
Managih manggaruang panjang
"Kanai umbuak den nan iyo
Kanai kicuah moh den di urang"
Tuan manyahuik moh diimbau
Di siko tuan den janyo
Dicaliak hilia jo mudiak
Dicaliak malah sungguh-sungguah
59
