Manjawab si Murai Randin
"Jan tuan katokan juo
Indak guno ameh jo perak
Indak guno sawah jo ladang
Ameh perak den tuan den surang
Sawah ladang den tuan den juo
Tuan ka ganti inyiak mamak
Ka ganti mande jo bapak
Ka ganti rumah nan gadang.
Manangih si Manjau Ari:
"Adiak kanduang si Murai Randin
Den sakah indak tasakah
Dirangkuah baduo-duo
Den tagah indak tatagah
Kau mak den suruah juo."
Bakato si Murai Randin:
"Elok katidiang jo ragi
Ragi katidiang jo rago
Dibao anak rang Kamang
Elok sairiang jo adiak
Adiak sairiang jo kako
Indak barek tajinjiang surang.
Bakato si Manjau Ari
"Adiak kanduang si Murai Randin
Kok kito bajalan jauah
Musuah jo lawan tak samato
Antah harimau mamakan kau
Antah gajah mandorong kito
Antah ula malulua adiak."
Manjawab si Murai Randin:
"Guntiang Minduro sahalai jubah
Dibao Siti pulang mandi
Jan diduo kato Allah
Dimano janji ditapeki
Dangakan sabuah lai:
Bakukuak ayam urang Rao
61
