"Kok baitu kato tuan
Kato indak bajawab lai
Kok gayuang indak basambuik
Legaran tipak di hambo
Dihari sahari nangko.
Mano tuan-tuan kasadonyo
Basigap tuan sadonyo!”
Bakato Mahampiang Basi:
"Nyak mati nak urang nangko
Lieklah di kau padang hambo
Padang salaweh daun pisang
Ukan saketek mambunuah urang
Elok kok tabuang samiang
Manjau ganjua bak batanam
Rancak ko anjiak sayo samiang."
Bakato si Murai Randin
"Tuan denai Mahampiang Basi!
Ganjua suruik bak batanam
Gadang kok palambuak tanah
Kuek kok anjiak sayo samiang
Namun anak nan surang nangko
Bapantang karam di lauik
Bapantang mati di rimbo
Antah kok mati tangah rumah.
Kok baitu kato tuan
Tuan caliak padang hambo
Padang janawi mamutuih rantai
Den sintak bakato-kato
Den saruangkan marunguih
Asam darah kiliaran dagiang
Tibo di tulang lamak manih."
Tagak badiri inyo si Murai
Gilo malintiak-lintiak jari.
Lah berang hati Mahampiang Basi
Alah dipakuak anyolai
Digerakkanyolah abuaknyo
Abuak nan panjang singgan tumik
73
