Patah patigoloh sakinnyo
Sakik bak raso ka barubah
Lah disintaknyolah rencong tu
Digatokkannyo malah ka pinang
Pinang tagatok tangan luko
Darah lah mamanjuik-manjuik.
Dek sakik batambah sakik
Manangih si Murai Randin
Manangih manggaruang panjang:
"Tuan den si Manjau Ari!
Tuan den jagolah tidua
Baa talalokkan lalok!"
Ka dijagokan dunsanak awak
Lah malu manjagokan.
Bakato si Murai Randin:
"Anak rang di Simarasok
Nak lalu ka Ujuang Guguak
Salamo nangko moh lalok
Haruihlah badan ka gapuak."
Kalusuak sunulah si Murai
Muko nan morak lah muram
Abuak nan panjang lah kusuik
Dek lamo bakalamoan
Lah payah si Murai Randin
Paluah lah bacaricikan
Batangkuik bumi jo langik
Lah kalam-kalam nan tarang
Angok bacarai jo badan
Lah mati si Murai Randin.
Lah jago si Manjau Ari
Diliek adiak lah mati
Awak baduo tingga surang
Manggaruang panjang anyolai
"Murai Randin adiak kanduang!
Jo sia hambo ditinggakan
Disia dipataruahkan
84
