To kito duduak ka ateh anjuang
Manga tuan duduk di siko
Mari kito naiak ka anjuang!"
Manjawab si Manjau Ari:
"Jan lai hambo naiak ka anjuang
Hambo indak asa duduak sinan
Asa hambo duduak disiko
Sajak di inyiak di mamak hambo."
Bakato Puti Kasumbo
"Jan tuan bagarah-garah!
Jokok hambo caliak rasan mato
Jokok hambo awai rasan tangan
Marilah kito ka ateh anjuang!"
Inyo naiak ka ateh anjuang
Sadang dalam kulambu ambun
Mamakai si Manjau Ari
Sarawa panjang batakat
Maratuih intan di kaki
Babaju pidandang hijau
Kileknyo bacando paneh
Linduangnyo bacando laia
Badeta palangai hijau
Tiok suduik tiok piganta
Tiok jorong tiok hikmat
Di tangah sipalik gilo
Panggilokan urang nan banyak.
Dek lamo bakalamoan
Lah lakek kain jo baju
Dek pueh balolak lolai
Hari basarang patang juo
Patang bajawek dangan sanjo
Sanjo bajawek jo malam
Lah turun diateh anjuang
Dibaka telong kiri kanan
Siang ruponyo rumah gadang.
Lah duduak si Manjau Ari
Sadang diateh kasua gadang
Nasi disanduak dek si Kambang.
96
