Dek hedangan alah talatak
Dek nasi alah tasaji
Bakato si Manjau Ari:
"Padi ranik jo padi jintan
Padi ketek rimbun daun
Dibao urang Padang Panjang
Nasi disanduak kapinggan
Jo sia hambo sadaun
Hambo bapantang makan surang.
Manjawab si Kambang Manih
"Padi ranik jo padi jintan
Padi ketek rimbun daun
Dibao urang Koto Tuo
Nasi den sanduak ka pinggan
Jo sia tuan ka sadaun
Jo aciak Puti Kasumbo."
Inyo lah duduak kaduonyo
Duduak batantang-tantangan
Surang bulan surang mantari
Samo cadiak kaduonyo
Inyolah makan anyolai.
Kok lengah si Manjau Ari
Mancaliak Puti Kasumbo
Lengah Puti Kasumbo
Mancaliak si Manjau Ari
Surang takaca di lapiak
Surang takakok di kalingkiang.
Sudah makan sudah minun
Pinggan baambiak dek si Kambang
Dek malam samalam nantun
Sakalok indak ditiduakan
Duo kali ayam bakukuak
Cukuik katigo hari siang.
Lah sahari duo hari
Digua tabuah larangan
97
