Galanggang badiri sahari tu
Rami sabuang ukan kapalang
Bulu ayam batundo-tundo
Darah ayam sapantun sungai
Ditiliak pado taruah ayam
indak urang babilang puluah
Urang babilang ratuih ribu.
Alah sahari duo hari
Sampailah janji tujuah hari
inyo ka kawin anyolai.
Barapolah anak puti-puti
Barapolah anak rando gadih
Anak mudo banyak sakali
Bajuak anak sutan-sutan
Barapolah anak rajo-rajo
Anak baiak dalam nagari
Dimalam samalam nantun
Raso ka runtuah rumah gadang
Banyaklah ragam pamainan
Rajo-rajo bamain catua
Sutan-sutan bamain kudo
Urang Kaliang bamain api
Urang Bugih basipak rago
Dimalan samalam nantun
Baradok kali dangan wali
Banyaklah malin jo tuanku
Badiri sasi nan barempek
Inyo lah kawin anyolai
Duduak satandiang Puti Kasumbo
Duduak dakek si Manjau Ari
Ditiliak pado pakaiannyo
Bapakaian Puti Kasumbo
Haragonyo indak taharagoi
Harago satimbang jo nagari
Intan jo podi bakilekan
Si Manjau baitu pulo
99
