Inyo manangih sadang itu
Takiro hati di nan jauah
Mandiri rupo si Murai
Anak kanduang lakehlah gadang
Kok le malu den ka tapupuih
Kok le utang den
ka tabayia
Lah gadang anak
Gadang bak diambak-ambak
Cadiak bak diaja-aja
Gadang alah bakalaka
Cadiak alah babicaro.
Bakato si Manjau Ari:
'Anak Kanduang Rangin Pamenan
Anak kanduang si Rajo Nyayo!
Kito pai bajalan
Mari kito pai ka pakan
Nyak tahu urang di awak
Awak nak tahu di urang
Mak tahu disusun urang
Mak tahu di adat-adat.
Mintak pitih duo puluah ria
Sadang ka bakeh mande kalian
Balari Rangin Pamenan
Dimintaknyo pitih bakeh mandenyo
Mande kanduang hambo!
Bari hambo pitih di mande
Duo puluah ria banyaknyo
Ka balanjo hambo ka pakan.'
Dek kasiah di anak kanduang
Apo kahandaknyo dibarikan
Apo pintaknyo dipalakukan.
Dibarikan duo puluah ria
Inyo bajalan anyolai
Bajalan batigo baranak
Lah tibo pulo di pakan
Uranglah basusuak rami
Rami urang batumpuak-tumpuak.
101
