"Bapak jo hambo di bapak
Indak bapak bahati rusuah
Salaruik salamo nangko
Baalah talamakkan makan
Baalah talalokkan tidua
Hati bak hati palapah
Mande hambo dimalah kini
Mande hambo si Murai Randin
Dimalah bapak tinggakan?”
Manangih si Manjau Ari
Mandanga kato anak kanduang
"Anak kanduang Rangin Pamenan
Nan indak nan ang katokan
Awak den indak badunsanak."
"Mambunyi bapak di hambo.
Pucuak sijali sijalinteh
Pucuak sijawi-jawi mudo
Di langik bapak malinteh
Hambo dibaliak itu pulo
Tahu hambo di mande hambo
Indak mati di dalam rimbo
Indaknyo mati di panyakik
Inyo mati dangan sabab
Mati tasaik kanai rencong
Takalo mande ka mati
Hambo nan tahu dahulunyo
Dari mati sampai ka tingga
Tasanda di kayu gadang
Langkok jo alat pakaiannyo.
Langkok jo payuang nan sakaki."
Manangih Rangin Pamenan
"Takalo mande ka mati
Bapak lalok maso itu."
Bakato Rangin Pamenan:
"Adiak kanduang Rajo Nyayo!
104
