Apo pikiaran adiak kanduang
Mande kito mati di rimbo"
Manjawab si Rajo Nyayo:
"Kok itu tuan tanyokan
Pulang pikiaran bakeh tuan
Tuan nan tahu nan pandai
Bajalan tuan den turuikkan.”
"Kok baitu kato adiak
Kito japuik mande kito,”
Manangih Rangin Pamenan
Malu ka tumbuah di awak
Cacek ka datang kudian.
Bakato Puti Kasumbo:
"Anak kanduang Rangin Pamenan!
Apo bana nan ang tangihkan?
Ameh perak banyak di kito
Buliah ang basuko hati."
Manjawab Rangin Pamenan:
"Tak alu sagadang nangko
Alu tatumbuak di tabiang
Di tabiang rang Koto Tuo
Tak malu sagadang nangko
Malu tatumbuak di kaniang
Mande hambo mati di rimbo.
"Adiak kanduang si Rajo Nyayo
Turuikkan hambo di adiak."
Bajalan Rangin Pamenan
Balari Puti Kasumbo
Dipacikkan anak kaduonyo
Dihambek indak tahambek
Dilarang indak talarang
Jadi bajalanlah sadonyo
Pai balimo baranak
Dek lamo lambek di jalan
Bakato Rangin Pamenan
105
