"Kok nyak manyilau kayo Allah
Tarantang jalan ka dituruik
Nan sabulan pajalanan
Ampek hari lah tibo,"
Lah tampak di nyo kayu nantun
Kayu nan bapucuak sirah.
Bakato si Manjau Ari
"Anak kanduang kudian saketek
Nak den dahulu kiun
Mak den silaulah dahulu
Antah lai antah indak
Antah busuak manjadi tanah
Antah caia manjadi ambun."
Lah bajalan si Manjau Ari
Didapekinyolah adiaknyo
Adiaknyo baitu juo
Tasanda di kayu gadang
Usah ka ratak retai tidak
Usah kaluak lambang tido
Payuangnyo takambang juo
Disingkokannyo mukonyo
Jangan ka ratak retai tidak
Ruponyo basarang elok
Romannyo basarang labiah.
Manangih si Manjau Ari
"Murai Randin adiak kanduang
Murai jago malah tidua
Anak kau datang manjapuik
Kakakkau datang kamari."
Manangih bagolek-golek.
Balari Rangin Pamenan
Bapak jo hambo di bapak
Ka pasiak malah ko bapak
Urang mati nan ditangihi
Bajalan bapak kasanan
Mak hambo bapacah jo mande hambo
Indak bakitu rang bapacah."
106
