KABA SI MANJAU ARI
Kaik-bakaik rotan sago
Takaik di aka baha
Sampai ka langik tabarito
Jatuah ka bumi jadi kaba
Takaba takadia Allah
Takaba Datuak Bandaharo.
Itulah urang nan urang
Gadangnyo indak mambali
Kayonyo sunduik-basunduik
Gadangnyo asa barasa
Pusako turun dari nyinyiaknyo
Indak basimpang basapiah babalahan
Mangkuto dalam nagari
Iyo nagari Padang Tarok
Nagari nan limo koto
Suaian sungai balantiak
Nan tacelak tampak jauah
Nan tabirumbun tampak hampiang
Nan tasabuik ka kaluaran
Palentahnyo sadang baturuik
Titahnyo sadang bajujuang
Katonyo sadang badanga
Mambunuah indak mamampeh
Iolah Datuak Bandaharo
Urang baduo bapadusi
Dek lamo bakalamoan
Lah sabulan duo bulan
Lah sampai pulo samusim
Sakitu lamo babaua
Bamimpi puti Linduang Bulan
13
