Salaruik salamo iko
Indak mande kanduang mangana
Indak maingek bapak lai
Mak hambo uluakan mande pulang
Mak hambo liek kampuang mande
Baitu adat rang bamande
Jauah hampiangnyo hambo jalang."
Manjawab si Murai Randin
"Kok baitu kato anak
Rumiklah hambo ka mambari
Ikolah jinihnyo badan hambo."
Manjawab Rangin Pamenan
"Mande kanduang si Murai Randin
Jan sabanyak nantun jawab
Kok tak amuah hambo hantakan
Sabuah pintak bakeh mande:
Kok tak suko mande baranak
Kok tak sayang mande di kami
Guno kami lah banyak bana
Indak badaso jariah kami
Bari hambo rotan sakarek.
Kok indak amuah hambo uluakan
Baserak sirialah kito
Bakuduang-kuduangan rotan
Sadanglah mande baranak
Kok hambo baitu pulo."
Duduk bamanuanglah si Murai
Mandanga kato nan baitu
Kasiah di anak ukan kapalang
Takuik ka carai jo anak
Guno anak gadang sakali
Dunia akirat tak tabaleh.
Manjawab si Murai Randin
"Kok baitu pintak anak
Pintak babari di hambo."
111
