Manjawab Rangin Pamenan
"Kahandak anak lah mande bari
Pintak hambo sudah balaku
Kini-kini kito bajalan."
Bakato Rangin Pamenan
"Mande hambo Puti Kasumbo
Kito bajalan kini nangko
Kito hantakan mande hambo
Mande kanduang si Murai Randin
Ka Ranah Payuang Sakaki
Di sanan kampuang mande hambo."
Alah sadio kasadonyo
Inyo bajalan anyolai
Ka kampuang si Murai Randin
Ka Ranah Payuang Sakaki
Elok kampuang ukan kapalang.
Dek lamo bakalamoan
Lah sabulan duo bulan
Lah tibo pulo disanan
Dicaliak kampuang lah langang
Rumah tanggo lah jadi tanah
Kabau bantiang lah habih pulo
Sawah ladang lah jadi rimbo
Salamo ditinggakannyo.
Lah manangih si Murai Randin
Duduak mangana badan diri
Dikana Allah jo Muhammad
Datang garak kapadanyo
"Anak kanduang si Murai Randin
Jangan anak duduak tapakua!"
Bakato Allah jo Muhammad:
"Cintolah rumah gadang kau!"
Kununlah si Murai Randin
Lah takana di nyo cincin
Cincin banamo cinto-cinto
Dibakanyo kumayan putiah.
112
