Dek kahandak sadang balaku
Pintaknyo sadang babari
Rang mudo si Murai Randin
Sawahladang kabau jo bantiang
Ameh perak rumah gadang
Lah dicintonyo kasadonyo
Lah suruik bagai samulo.
Rumah gadang lah badiri
Sarupo jo nan dahulu
Saketek tidak basalisiah
Ameh sakati tidak usak
Antah kok jadi labiah banyak
Labiah elok pado saisuak.
Inyo lah naiak ka ateh rumah
Disingkokkan pintu sadonyo
Pintu nan salapan puluah salapan
Nan ketek indak babilang.
Inyo lah naiak ka ateh anjuang
Tanunnyo tarantang juo
Mahimbau malah si Murai'
"Aciak kanduang Puti Kasumbo
Naiak ka rumahlah sadonyo!"
Dek lamo bakalamoan lah lalu bapak si Manjau
Lah lalu mande si Manjau
Lah ka halaman rumah gadang.
Bakato si Manjau Ari
"Anak kanduang Rangin Pamenan
Balilah di ang paku nantun
Nan dibao urang tuo tu
Barapo janyo bali samiang!"
Baruari Rangin Pamenan
Lah dibalinyo paku nantun
Apo nan dibaonyo dibalinyo
Lai sakali duo kali
Apo nan dibao indak suruik.
Dek hibo si Manjau Ari
Hibo di mande jo bapak
Dibari kain jo baju.
113
