Bajalan malah bapaknyo
Bajalan bakeh tuanku
Tuanku guru si Manjau
Lah tibo pulo di surau
Lah diliek dek Tuanku
Mande bapak si Manjau bakain babaju
Kain jo baju diuangkainyo
Kain-kain dibari urang
Awak tak buliah mamakainyo
Itu hukum di mande si Manjau
Itulah ajab di tuanku
Kato tak buliah dijawab
Surang indak bakehnyo takuik
Takuik di si Manjau surang
Lamo saketek antaronyo
Lah sampai pulo ka rumah.
Ka rumah si Manjau Ari.
Awak tak tahu di anak
Anaknyo tak tahu di apaknyo.
Bijaksano Puti Kasumbo
Lah dihimbaunyo malah ka rumah
Si Manjau cando tak tahu
Dek malu di Puti Kasumbo.
Lah ka rumah bapak si Manjau
"Kok le hibo kasiah di kami
Jan kami dibari kain
Indak kami buliah mamakai
Di tuan siak Labai Panjang
Kami lah dipabudaknyo
Sajak paningga anak kami
Diam di rumah indak buliah
Diam di bawah lumbuang samiang
Bak cando anjiang kami di nyo."
Bakato Puti Kasumbo:
"Mande makanlah ko nasi!"
Minum makan apak si Manjau
Lah sudah minum jo makan
114
