Bakato Puti Kasumbo:
"Manolah mande kanduang hambo!
Mulo mande ka marasai
Mande picayo di tuanku
Apo katonyo dituruikkan
Ikolah nan ka balehnyo
Batanyo hambo di mande
Kok tanyo hambo nan sasek
Buruak elok ka hambo tanyokan
Antah kato hambo nan sasek
Dek hambo nangko anak ketek
Mintak ampun hambo di bapak
Mintak maaf gadang-gadang.
Hambo tiliak pado aka
Hambo pandang mande jo bapak
Roman-baroman urang dagang
Rupo bak rupo rang kayo.
Apolah salah silahnyo
Mangko badan jadi bak nangko?"
Manjawab bapak si Manjau
"Kok itu nan ditanyokan
Takalo maso dahulunyo
Hambo nan rajo dalam nagari
Hambo nan kayo dalam kampuang
Urang banyak bak janyo hambo."
Kato dijawab dek Puti Kasumbo:
"Apo salahnyo di badan
Mangko jadi sarupo iko?"
Manjawab bapak si Manjau
"Takalo kami ka bansat
Salah di kami nangko juo
Kami manuruik kato urang
Sajak ditinggakan anak kami
Ikolah jinih parasaian.
Anak duo bak anak balam
Inyo bajalan kaduonyo
115
