Halaman:Kaba Si Manjau Ari.pdf/23

Mimpi mamaluak gunuang
Mimpi mampasalendang bulan
Bak itu mimpi padusinyo
Dikatokanyolah mimpinyo tu
Kapado Datuak Bandaharo.
Bakato Datuak Bandaharo
"Kalau bak itu mimpi adiak
Tando nagari ka babunyi.

Dek lamo bakalamoan
Lah dalam tian anyolai
Tibo diukua dijangkonyo
Lah sampai sabilangan
Lah lahia pulo anaknyo.
Sahari ado sahari bakato
Lah dapek namo jo galanyo
Le ketek Si Manjau samiang
Lah gadang si Manjau Ari.
Di maso sahari lahia
Tibo di lantai, lantai patah
Tibo di rusuak, rusuak kuduang
Tibo di sandi, sandi balah
Itulah kabasaran si Manjau.
Bakato mande bapaknya:
"Anak kanduang darehlah gadang
Pamupuih malu di kaniang
Pambangkik batang tarandam
Pamenan hati jo mato
Ubek jariah palarai damam
Hubuang nyao rangkai hati den
Anak kanduang si Manjau Ari

Dipilin sapilin lai
Tapilin urek mangkudu
Ditindin satindin lai
Lah tahu tagak di pintu

Gadang bak diambak-ambak
Tinggi bak dibubuik-bubuik
Bak lobak dipanyiaran
Rak jaguang tangah duo bulan

Templat:Left