Mintak tobat kapado ibu."
Manarimo si Manjau Ari
Bapaknyo baitu pulo
Dihadokkan hati pado Allah
Lah dihabihi tu jo doa.
Malin lah sudah mandoa
Lah sudah makan jo minun
Manitah Rangin Pamenan:
"Panghulu hambo dalam nagari
Sampai ka hilia sampai ka mudik!
Dangakan bana titah hambo:
Kok kampuang mak bapanghulu
Kok nagari mak barajo
Nagari lah lamo tak barajo
Kini barajo anyolai
Nan ka jadi rajo bapak hambo
Io lah si Manjau Ari."
Banyak indak urang manjawab
Sakato urang marajokan.
Lah pulang urang samonyo
Baitulah sayang urang.
Lah sahari duo hari
Lah sapakan duo pakan
Bakato Rangin Pamenan
"Apak denai Manjau Ari!
Alun juo sanang hati den
Mangkonyo sanang hati kami
Mangkonyo utang lah babayia
Mangko malu buliah tapupuih
Bunuahlah guru bapak nantun
Mangkonyo sanang hati kami."
Manjawab si Manjau Ari:
"Baa janyo hambo mambunuah
Guru indak buliah dilawan
Guru indak buliah dibunuah
Guru ka guru juo
Guru dunia akirat!"
119
