Pamagang kipeh di kanan den
Paambiak kendi ateh anjuang
Akan panyapu-nyapu sarok
Itulah ka gunonyo di hambo."
Manangih Puti Kasumbo:
"Anak kanduang Rangin Pamenan!
Kambaiak Allah anak kanduang
Mak den suruikkan bana-bana
Iyolah bapak jadi rajo
Kok bajalan anak kasanan
Rencong Aceh masuak ka paruik
Anak mati kamipun mati."
Manjawab Rangin Pamenan
"Den nyak kuah den nyak kanji
Nak basudu bilang-bilang
Kok tuah maknyo mamanji
Kok tak badan mak nyo hilang."
Inyo bajalan anyolai
Tibolah inyo tangah halaman.
"Manolah amai kanduang hambo
Hiduik jo mati tak bacarai
Nyao nan panjang panjang juo
Jangan mande bahati bimbang
Jan kami mande rusuahkan."
Inyo bajalan anyolai
Inyo bajalan baduo baradiak
Tibo pulo inyo di sanan
Di ranah kampuang tuanku
Di Ranah Kampuang Kaluaran
Inyolah naiak ka ateh rumah.
Bakato Rangir Pamenan:
"Mano kalian kasamonyo
Kito bajalan kini-kini!”
Manyahuik urang nan banyak
"Ampunlah kami Tuan kaciak
124
