Apolah salah badan kami
Utang tidak piutang tidak."
Bakato Rangin Pamenan:
"Janlah banyak-banyak jawab
Baialah utang kini-kini!
Ukan tu utang ameh perak
Utang badan bayia jo badan
Utang malu bayia jo malu
Turun kalian kasamonyo!"
Manangih malah sadonyo
Anggan tak buliah dikatokan.
Basintak padang anyolai
Rang mudo Rangin Pamenan
Diriangkannyolah jo padang
Lah sabanta pajalanan
Inyolah tibo anyolai
Dikampuang si Murai Randin
Lah ka rumah Rangin Pamenan.
"Mande kanduang Puti Kasumbo!
Alah sanang hati kami
Ikolah lamak hambo makan
Ikolah tidua mangko lalok
Utang malu tabaia di hambo
Utang nyao damikian pulo
Baitu adat rang bamalu.
Mande kanduang lah buliah budak
Itulah inyo di halaman
Itulah kamaanakan dek tuanku.
Mande buliah agiah-agiah
Bari batakok kasadonyo
Baduo budak didapua
Baduo budak ka aia
Batigo budak panumbuak
Barampek budak kundangan."
Bamanuang Puti Kasumbo.
Rusuah nan bukan alang-alang
Mancaliak laku anak kanduang
125
