Bakato Puti Kasumbo:
"Kok tumbuah gaduah pado kito
Kok datang tokak jo kalahi
Apolah pikiaran kito
Kito di dalam kampuang urang?"
Lah sahari duo hari
Lah sapakan duo pakan
Usua tidak pareso tidak
Sampai sabulan duo bulan
Bakato Puti Kasumbo:
"Lah ka sanang hati adiak
Den mamintak bakeh adiak
Lah salaruik iko den siko
Den takiro di mande den
Mande kanduang den raso tampak
Nak pulanglah den dahulu.”
Urang mudo si Murai Randin
Baru mandanga kato nantun
Tadanga kato lah ka pulang
Hibo dibadan tingga surang
Baru takato nan kapulang
Hati nan tidak sanang lai.
Manjawab si Murai Randin:
"Aciak kanduang Puti Kasumbo
Disiko aciak dahulu
Agak satahun duo tahun
Mangkonyo sanang hati hambo."
Dek lamo batangka-tangka
Dilapehnyo di si Murai.
Aciak kanduang sungguah den lapeh
Tinggakan anak kanduang kito
Kok tak ka tingga kaduonyo
Salah surang tingga juo.
Baolah si Rajo Nyanyo
Tinggakan Rangin Pamenan
Ka pauhek-ubek rusuah
Ka ganti badan tubuah aciak."
126
