Kato tak bajawab dek Puti Kasumbo
Ditinggakannyo anaknyo surang
Puti Kasumbo babaliak pulang
Balari si Murai Randin
Balari naiak kaateh anjuang.
"Nak kanduang Rangin Pamenan
Anak kanduang mari kamari!"
Lah naiak Rangin Pamenan
Lah tibo di ateh anjuang
Inyo bacongkak ateh njuang
Panek bacongkak inyo bacatua
Itu parintang-rintang hatinyo.
Bakato si Murai Randin
"Bapantun hambo sabuah
Babunyi saluang di bantu
Dibaliak rimbo Koto Tangah
Lauik nyato gunuang lah tantu
Rusuah jo apo ka dilengah.”
Manjawab Rangin Pamenan:
"Mangkonyo rusuah ka talengah
Kito jalang mande kanduang den
Marilah kito bajalan."
Lah bajalan tu baduo
Lah lamo inyo bajalan
Inyo lah tibo pulo di sanan.
Si Moerai lah datang pulo.
Manyonsong Puti Kasumbo
Balari turun ka halaman
Dibao naiak ka rumah
Duduak baduo baradiak
Datanglah kipeh kiri kanan
Sadang mangipeh-ngipeh dado
Inyo barundiang anyolai.
Bakato Puti Kasumbo
"Agak tacameh awak kami
Kok lai silang jo salisiah."
127
