Halaman:Kaba Si Manjau Ari.pdf/25

Gadang alah bakalaka
Cadiak alah babicaro
Bakato Datuak Bandaharo
Anak kanduang si Manjau Ari
Dareh-darehlah ang gadang
Bak cadiak diaja-aja
Anak kanduang si Manjau Ari.
Cadiak alah bapikiaran
Lah tahu dimurah maha
Lah tahu dilabo rugi
Tahu diadat jo pusako
Urang paarih bijaksano."

Dek lamo bakalamoan
Si Manjau bamimpi anyolai
Bakato si Manjau Ari
"Gadang aia mangarak sawah
Hanyuik batang tunggang halintang
Den mandencek ka batu gadang
Duduak badiri den di sanan
Den mahadok luruih ka bilat
Mimpi den mampasalendang bulanı
Mimpi den mampasuntiang matohari
Mampacacah garam urai
Mampagatok lado sulah
Mimpi den mamaluak gunuang
Bak itu mimpi den Bapak
Kamano taawia mimpi den tu?"

"Anak kanduang si Manjau Ari
Mak den cari hari kutiko".
Ditiok-tiok ditahuni
Dipapa-papa dibulani
Dibilang-bilang dihari
Basuo katiko mimpi.
"Kalau bak itu mimpi anak
Ka juaro malah ang Manjau
Amuahkan di ang manjabuang
Den tintiang banang bulang
Mak den titiakkan ang taji
Amuahkan di ang juaro