Manjawab Rangin Pamenan:
"Silang indak salasiah indak
Di malam malah nan samalam
Baa rasonyo ka lalok
Di dalam pakan nan sapakan
Sakali indak lamak makan
Salamo mande tinggakan
lo mande si Murai Randin
Itu sabab mangko kamari
Taragak ukan alang-alang
Mande hambo si Murai Randin
Hibo bacarai jo mande
Dek sampai kasiah bakeh mande.
Lah sahari duo hari
Maka suik hati nyak mambao
Salamo kito bacarai
Antah bakmano hati hambo.
Manjawab Puti Kasumbo:
"Ka batangguah hambo tak buliah
Eloklah kito bajalan.'
Lah tingga mandenyo surang.
Lah tibo pulo disanan
Agak sapakan duo pakan
Bakato Puti Kasumbo
"Apak hambo Datuak Bandaharo
Mande hai Puti Linduang Bulan!
Dangakan bana kato hambo
Nan surang maknyo baduo.
Mangko baitu kato hambo
Ditiliak pado si Murai
Disilau kapado umua
Musin lah sampai di si Murai
Eloklah inyo kito kawinkan.'
Bakato Puti Linduang Bulan
"Den tak tahu den tak pandai
Pulang pikiaran dek kalian
Sutan dimano nan ka manunang
128
