Rajo di mano nan lah dapek?”
Manjawab Puti Kasumbo:
"Kok nan itu mande tanyokan
Tunangan si Murai Randin
Tunangan samaso ketek
Bagala Sutan di Kinali
Anak kanduang Rajo di Kinali
Itulah rajo nan asa
Asanyo turun-tumurun.'
Bakato mande Linduang Bulan:
"Anak kanduang Puti Kasumbo
Kok itu nan dihatinyo
Bak mano tenggang kalian
Urang jauah kitopun jauah
Siapo urang nan ka dibao?”
Manjawab Puti Kasumbo
"Jan itu Mande rusuahkan
Lah suko Mande jo apak
Indak nan jauah di kami
Kok tak aia sumua dikali
Kok tak kayu janjang dikapiang
Bak itu urang baradat.
Indak urang nan tak amuah
Puti-puti dapek dihambo
Itu ka tolong badan hambo."
Digua tabuah larangan
Sahuik-manyahuik tabuah nan banyak
Mambaleh tabuah di koto
Takajuik urang nagari
Lalu ka suok jo ka kida
Sampai ka hilia jo ka mudiak
Datanglah urang sadonyo
Parentah Datuak Bandaharo
Batapuak urang kasanan
Banyaklah puti nan kasanan
Barapolah anak rando gadih
129
