Bak ka luluih kampuang si Murai
Barapolah bunyi-bunyian
Lah datang rajo jo panghulu
lo manarang jo mangusuih.
"Sabab kami agak tacameh
Tabuah larangan lah bagua
Manyahuik tabuah nan banyak.
Laikoh parik nan tarantang
Laikoh rando buliah malu
Dimano panghulu buliah baso?"
Manjawab Puti Kasumbo
"Manolah panghulu hambo
Manolah rajo samuonyo
Kok itu nan ditarangi
Indah tumbuah di nagari
Adolah karajo kabaikan.
Kito ka mamancang galanggang
Si Moerai Randin ka dikawinkan
Urang nan ka tunangannyo
Indaklah cari ibu jo bapak
Indaklah aka budi hambo
Inyolah mancari sandirinyo
Bukan to anak rajo siko
Anak rajo dari Kinali
Banamo Sutan di Kinali
Adiak kanduang Puti Taruih Mato
Adiak puti nan baranam
Itulah urang kito japuik."
Bakato Puti Nan Bonsu
"Mintak pikia hambo tigo hari
Sampai janji kito batamu."
Di dalam hari nan tigo
Datang sadonyo anak mudo-mudo
Sarato anak rando gadih
Urang bajabatan lah sadonyo
Sagalo anak puti-puti
Mangarang alat jo pakaian
Anak mudo mangarang bungo
130
