Barapo banyak ragam pakaian
Ditiliak ragam pamakanan
indaklah ado ka bandiangnyo.
Dalam hari nan tigo hari
Lakeklah tirai kasadonyo
Tabantang tabia tangah rumah
Kulambu bajambua ameh
Tirainyo bajambua perak
Dipasang pulo tampat tidua
Disanan intan bakilekan
Dikalatiaki aia bungo
Banyak ragam minyak dipakai.
Sudah talatak kasadonyo
Janji sampai hari lah tibo.
Bakato Puti Kasumbo
"Carikan hambo urang cadiak
Cadiak pandai nan bijaksano
Ka kawan hambo bajalan
Ka ranah kampuang Kinali."
Dapeklah urang cadiak pandai
Lah dapek urang baranam
Bajalan Puti Kasumbo
Ka kampuang Puti Taruih Mato
Bajalan bagageh-gageh.
Dek kuek inyo bajalan
Lakehlah tibo disanan
Lah tibo pulo di halaman.
"Aciak kanduang Puti Taruih Mato!
Lailah di rumah tu kini?”
Manjawab Puti Taruih Mato
"Baa den tak ka di rumah
Hari nan sadang tangah hari.
Sitapuang tangah halaman
Den ambiak kiliaran taji
Jan lamo adiak di halaman
Iko aia basuahlah kaki."
131
