Lah panuah urang di halaman
Allahu Rabbi banyak urang
Indak tabuek di nan laweh
Di nan lakuang lah panuah pulo.
Bakato Puti Taruih Mato
"Iriangkan Sutan di Kinali
Ka kampuang si Murai Randin!"
Basibuik si Kambang Manih
Mambao pakaian Sutan di Kinali
Satangah mambao bungo
Satangah mambao kipeh
Nan patuik mamacik karih.
Balari Salam Salamat
Dikambang payuang nan gadang
Payuang kuniang bajambua ameh
Itu pakaian rajo-rajo
Inyo bajalan anyolai
Sorak sadaruîh-sadaruih
Bunyi galak badarai-darai
Bunyi pantun babuah-buah
Babunyi pupuik jo sarunai
Babunyi rabab jo kucapi
Paarak Sutan di Kinali.
Dek hari sahari nantun
Garak tibo di Puti Kasumbo
Inyo lah tahu di rang ka tibo
Mambari kaba kadalam kampuang
Barapolah banyak sutan-sutan
Manantikan Sutan di Kinali.
Inyolah hampia anyolai
"Bunyi badia marandang kacang
Pasang mariam ciek-ciek
Raso ka luluih kampuang si Murai
Inyolah tibo di halaman.
Balari Salam Salamat
Mamacik kudo Sutan di Kinali
135
