Balari dubalang surang lai
Maambiak aia dalam cerek.
Lah dibasuah malah kakinyo
Inyo lah naiak ka ateh rumah
Duduak di ateh kasua gadang.
Barapolah anak mudo-mudo
Satangah mangapua pinang
Satangah mambuek paisok
Satangah mamacik api
Surang mangipeh dado.
Dek lamo duduak-duduk
Nasi tahanta kahadokan
Hari basarang patang juo
Patang bajawek jo sanjo
Sanjo bajawek jo malam.
Dek malam samalam nantun
Dipasang telong sadonyo
Badiri kali jo sutan
Mahadok sasi nan barampek
Badiri tuanku jo malin
Lah ijin mande jo bapak
Lah dimintaknyo malah kawin.
Dikawinkan inyo di Tuanku
Dimalam santalam nantun
Sakalok indak ditiduakan
Barisuak hari lah siang !
Lah tinggi candonyo hari
Barapolah banyak ragam main
Sutan-sutan bamain kudo
Rajo-rajo bamain catua
Urang banyak basuko hati.
Dihari nan tigo hari
Barapolah banyak ragam main
Lapeh dihari tigo hari
Satangah urang lah habih pulang
Satangah urang ka galanggang
Galanggang ramai tigo bulan.
136
