Dek lamo bakalamoan
Bakato Puti Kasumbo
"Adiak kanduang si Murai Randin!
Alah ka sanang hati adiak
Kok kahandak alah balaku
Niat jo kaua alah sampai
Nak kami pulanglah dahulu.”
Manjawab si Murai Randin
"Nantilah sabulan lai
Kok pulang alun ka manga."
Bakato Puti Kasumbo
"Rumiklah hambo tantang itu
Manjawab kato adiak nantun
Bakato kami tak kau danga
Salaruik salamo nangko
Mande kami tinggakan
Lah taragak awak kami.
Kok buliah kami bajalan
Indak lamo kami tinggakan
Lakeh-lakeh kami babaliak."
Manjawab si Murai Randin
"Kok baitu pintak Kakak
Mak hambo lapeh malah pulang."
Inyolah pulang sadonyo
Lah tingga si Murai randin
Awak baduo jo suami.
Ditiliak pado si Murai
Tujuah hari tapacaraikan
Bakato si Murai Randin:
"Tuan Sutan di Kinali
Kito jangkau anak kito
Anak kanduang Rangin Pamenan."
Manjawab Sutan di Kinali
"Kok baitu kato Adiak
Marilah kito bajalan.
Inyo bajalan anyolai
Lah tibo pulo disanan
137
