Elok bania kayu aro
Tumbuahnyo di tangah padang
Lah dilingkuang kayu anak
Amuahkan di ang juaro
Duduak di suduik galanggang
Lai dilingkuang rang nan banyak
Baitu adat rang juaro
Kok amuahlah ang juaro
Ameh perak banyak di kito
Nan ketek ka tonde paja
Nan gadang ka pupuak api
Sawah ladang banyak di kito
Sawah nan tujuah buah banda
Kabau bantiang nan banyak bana
Budak nan sakarek koto
Pangiriang duo kali lapan
Nan baadat bapusako
Rang baiak salendang dunia
Rang kayo suko baralek
Mande kayo bapak batuah
Urang mangadap bakuliliang
Rang kayo si Manjau Ari
Dek lorong kapado rumah
Rumah gadang sisangko gadiang
Salanja kudo balari
Sapakiak budak mahimbau
Atoknyo labah mangirok
Tutuarannyo alang babega
Halaman carano baasah
Urai tatabua indak hilang
Kunun hilang gando ato
Ditiliak bakeh cibuaknyo
Cibuaknyo kanso balariak
Janjangnyo perak sadonyo
Anjuang perak anjuang suaso
Katigo jo anjuang ameh."
Manjawab si Manjau Ari
Amuah bana den manyabuang
Halaman:Kaba Si Manjau Ari.pdf/27
↓Laman ko alah sah
