Urang babalam urang dalang
Urang bapikek urang binguang
Tak tahu di labo rugi
Tak tahu disiang malam
Ka bapasiak-pasiak mande
Ka badalang-dalang bapak
Pitih dibari basayok."
Kok indak amuah ang babalam
Nak den balikan ang kudo
Kudo nan balang samburani
Kaki nan rajah kaampeknyo
Iku anan putiah satandannyo
Kaniang nan bangkah daun bodi
Ditiliak pado palanonyo
Palanonyo ameh samato
Injah-injah perak sadonyo
Kakangnyo perak jo ameh
Tali kakang suto sadonyo."
Manjawab si Manjau Ari.
"Bukan murah urang bakudo
Pipik parik tabang saboyong
Hinggoknyo di batu taba
Nak lalu ka Koto Tuo
Amuah bana den bakudo
Taiak sabik sandang garondong
Mancari rumpuik nan taba
Bak itu tando tukang kudo."
Bakato mande jo bapak
"Jan itu pulo ang rusuahkan
Indak ang ka manyabik numpuik
Indak ang kamamandikan kudo
Budak lai sakarek koto
Pangiriang duo kali lapan
Anak kanduang utang manyuruah."
Manjawab si Manjau Ari
"Ukun murah manyuruah urang
Kito samo anak cucu Adam
Halaman:Kaba Si Manjau Ari.pdf/31
↓Laman ko alah sah
