Bakato bapak si Manjau:
"Mano ang Salam Salamat
Carilah di ang buah pinang
Pinang nan wangi batuntun
Siriah nan sirah-sirah gagang
Sadah bak cando banak balam
Gambia sapantun ameh matah."
Barawari Salam Salamat
Capek kaki ringan tangan
Urang paarih Salam Salamat
Alun disuruah inyo lah pai
Alun ditagah alah baanti
Dicari siriah jo pinang
Alah dapek siriah jo pinang
Dilatakkan ka carano
Sadang kadalam carano ameh
Tapi batatah aso-aso
Hari Jumahat sahari tu
"Mano ang Salam Salamat
Kito bajalan kini juo
Kito pi japuik Tuanku."
Bakato Salam Salamat
"Insya Allah jadilah angku.'
Lah ditariaknyo carano tu
Bajalan bapak si Manjau
Mairiang Salam Salamat.
Dek lamo lambek di jalan
Lah tibo pulo di musajik
Mambasuah kaki bapak si Manjau
Najaklah pulo ka musajik
Lah naiak Salam Salamat
Bajawek salam jo Tuanku
Tagak hadiri bapak si Manjau
Mambari salam kiri kanan
Lah bakato bapak si Manjau
Halaman:Kaba Si Manjau Ari.pdf/35
↓Laman ko alah sah
