Babunyi bunyi-bunyian
Mambilobok baruak tungga
Marantak kudo samburan.
Maantau balam tambage
Mandanciang salindik jantar
Mandarak katitiaran kuruang
Babunyi sarunai sangkokalo
Bagai talempong rajo Jao
Nan kok urang parapuah hati
Elok diratok ditangisi
Kok nan garok kagilan-gilan
Elok dirantak ditarikan
Baitu bunyi-bunyian.
Bakato si Murai Randir.
"Bunyi-bunyian tadanga di der
Sutan dimano nan lah tibo
Rajo dimano nan lah datang
O Kambang
Silaulah ka pintu
Kok indak tampak di pintu
Balarilah kau ka lua
Tinjaulah bakeh nan tinggi
Buang pandang kiri kanan."
Balari si Kambang Manih
Tagak badirinyo di pintu
Surang urangpun tidak nampak
Lalu balari pulo turun
Tibo inyo tangah halaman
Taruih ka pintu kaporo
Dicaliak bakeh nan tinggi
Dipandang hilia jo mudiak
Dibuang pandang jauah-jauah
Iah nampak di nyo Tuanku
Mamutiah candonyo malin
Babaliak malah nyo pulang
Balari-lari di jalan
Lah tiba pulo di halaman
Inyo lah naiak ka ateh anjuang
Halaman:Kaba Si Manjau Ari.pdf/39
↓Laman ko alah sah
