Badarak rumah nan gadang
Lah turun di ateh anjuang
Lah tibo di tangah rumah
Balalah cacak di paran
Manyemba bayang-bayangnyo
Bajalan ka ruang tapi
Mancampuang ka biliak dalam.
Dilantak peti lewang gadiang
Mandanguang tali bubuiktan
Badaruang tali nak kunci
Dibukak peti lewang langik
Diambiak alat pakaian
Kalua tirai langik-langik
Langik-langik bajambua perak
Tirainyo bajambua ameh
Ditiliak kapado tabia
Tabia suto barawaci
Ditiliak pado kulambu
Kulambu banamo kasah ambun
Itulah pakaian rumah gadang
Lakeklah tirai langik-langik
Tabia-tabia tapasang pulo
Tapasang pakaian rumah
Ditiliak kapado telong
Salapan puluah salapan
Sakitu banyak telongnyo
Tuanku tibo di halaman
Heran Tuanku mamandangi
Rangkiang tujuak sajaju
Nan gadang si Bayau-bayau
Nan tinggi si Tinjau-lauik
Katigo Rajo Babandiang
Nan ketek salo manyalo.
Dilek pado halaman
Halaman carano baasah
Urai tatabua tidak hilang
Cibuaknyo kanso balariak
Batu tapaannyo timah samiang
Janjangnyo ameh jo perak
Halaman:Kaba Si Manjau Ari.pdf/43
↓Laman ko alah sah
