"Angku basuah malah tangan
Angku makan malah ko nasi
Lah lamo jamba talatak."
Dibasuah tangan di Tuanku
Bapantun si Murai Randin
"Indak hambo pandai manangguak
Tangguak hambo hubuang-hubuangkan
Dibao rang Banuhampu
Indak hambo pandai basanduak
Sanduak hambo toyong-toyongkan
Badan hambo kan ketek baru.
Lah disingkok malah jamba
Barawuari si Murai Randin
Ditiliak pado pasanduakan
Ditapi samuik baririk
Di tangan awan bajumpo
Halintang samo halintangnyo
Sabuah nasi indak patah
Nan patah bapatampunkan
Bijaksano si Murai Randin
Lah manyuok malah Tuanku
Sakali inyo manyuok
Bak dilariak kumbang hijau
Lah cukuik katigonyo sudah
Kaampek mambasuah tangan
Sakitu makan urang baiak-baiak
Sudah minun sudah makan
Lalu maisokmakan siriah
Lah masak siriah sakapua
Sari lamak jatuah ka paruik
Sari morak tingga di muko
Sirahnyo tingga dibibia
Habih manih tabuang sapah
Bakato malah Tuanku
"Murai Randin anak kanduang
Apo makasuik sangajo kau
Katokan kato nan bana"
Halaman:Kaba Si Manjau Ari.pdf/51
↓Laman ko alah sah
