Manjawab si Murai Randin
"Ampunlah hambo pado Angku
Ampun di bawah tapak kaki
Gadang niat hambo pado Angku
Sabab angku hambo japuik
Tuan hambo si Manjau Ari
Lah basuruahkan manyabuang
Indak amuah nyo manyabuang
Lah basuruahkan jadi dubalang
Indak amuah nyo dubalang
Lah ka dibalikan inyo balam
Indak amuah nyo babalam
Bakudo bak itu pulo
Mangaji nan dihatinyo
Itu Tuanku hambo japuik
Tuan hambo ka hambo sarahkan
Tunjuak ajai di Tuanku."
Manjawab malah Tuanku
"Insya Allah jadilah itu
Murai Randin anak kanduang
Baolah si Manjau kamari
Mak den tunjuak den ajai"
Bakato si Murai Randin
"Tuan den si Manjau Ari
Tuan marilah kamari
Mak den tunjuak den ajai
Mak tahu adab baguru
Bakitu adab bakeh guru
Manyambah manyimpuah awak
Mangadab hadokan guru
Disusun jari nan sapuluah
Mambari salam bakeh guru
Bakitu adab bakeh guru.
Lah tobat si Manjau Ari
"Tuan den si Manjau Ari!
Pacikkan martabat baguru
Katonyo usah dijawab
Apo suruahnyo kito turuik
29
